Archives de la catégorie: Toriteny

Toriteny alahady maraina na fanompoam-pivavahana hafa

Apokalypsy 7 :9-10 : « Rehefa afaka izany dia hitako fa, indreo, nisy olona betsaka tsy tambo isaina avy tamin’ ny firenena rehetra sy ny fokom-pirenena sy ny olona ary ny samy hafa fiteny nitsangana teo anoloan’ ny seza fiandrianana sy teo anatrehan’ ny Zanak’ ondry, niakanjo akanjo fotsy lava sady nitana sampan-drofia teny an-tànany, dia niantso tamin’ ny feo mahery izy nanao hoe: Ny famonjena anie ho an’ Andriamanitsika, Izay mipetraka eo ambonin’ ny seza fiandrianana, sy ho an’ ny Zanak’ ondry ».

Ry havana malala, rehefa mihaino izany zavatra nitranga tany an-danitra araka ny fahitana nomena an’i Jaona izany isika amin’ity Alahady ity, dia ataoko fa manana hafatra roa sosona omena antsika Andriamanitra. Ny hafatra anankiray dia hafatra ho an’ny Mpitandrina mivady, satria moa fiaraha-miasan’ny Mpitandrina sy ny Fiangonana, dia ny hafatra iray izany, tsy maintsy ho an’ny Mpitandrina. Ary ny hafatra iray izany, tsy maintsy ho an’iza ? Ho an’ny Fiangonana.

I. Hafatra ho an’ny Mpitandrina
Misy hafatra 3 mazava omena ny Mpitandrina. Ny hafatra voalohany dia izao :
1. Taomy hibanjina an’Andriamanitra sy Jesoa Kristy ny olona
Rehefa mamaky mantsy isika ry havana malala, ny zavatra hitantsika dia izao : « Rehefa afaka izany dia hitako fa, indreo, nisy olona betsaka tsy tambo isaina…. » nitsangana taiza ? « teo anoloan’ ny seza fiandrianana sy teo anatrehan’ ny Zanak’ ondry ». Ny mason’izy rehetra nifantoka tery amin’ny seza fiandrianana, ny mason’izy rehetra nifantoka teo amin’izay mipetraka eo ambonin’ilay seza fiandrianana sy teo amin’ny Zanak’ondry. Taomy hibanjina an’Andriamanitra sy Jesoa Kristy ny Fiangonana.
Tokony ambarako ry havana malala, izaho izay ratsy toerana indrindra rehefa miresaka an’izany ; ny fahalemen’ny olona manana fahefana sy toerana hitondra dia ny mitarika ny mason’ny olona hibanjina azy ; fahalemena mampidi-doza izany raha ato anatin’ny Fiangonana ry havana, satria Jesoa Kristy irery no lohan’ny Fiangonana, Jesoa Kristy irery no tompon’ny Fiangonana, Andriamanitra Ray irery no tompon’ny fahefana rehetra, izay naniraka ny Zanany ho Mpamonjy izao tontolo izao. Taomy hibanjina an’Andriamanitra sy Jesoa Kristy ny olona.
Tsaroako eto izao, miresaka aminareo aho, ny vazivazy nataon’ny loholona anankiray tamiko indray maka. Pasitera hoy izy, niverina avy naka rivotra izahay, volana Aogositra ny fotoana fandehanana maka rivotra moa, niverina izahay Septambra : « Pasitera an, izaho te hanao tolo-kevitra anankiray ». Inona hoy aho ny tolo-kevitrao tompoko ? Ray aman-dreny lehibe izany. « Rehefa handeha hanao vacances ianao an, dia manamboara poster anao lehibe apetraka eo amin’ny pilopitra ». « Inona aty ity hoy aho ? Fa ahoana tompoko hoy aho ? » ; « Ka izao hoy izy : rehefa lasa manao vacances ianao Pasitera, very sasaka ny mpiangona tonga eto ». Eto Isotry Fitiavana moa tsy mba misy an’izany. Fa any amin’ny Fiangonana sasany izany, rehefa tsy eo Pasitera, dia tsy tonga miangona ny olona. Dia inona hoy aho no ataon-dry zareo ? « An an an, miverina manasa lamba Alahady ry zareo, miverina maka vilona ». Tany ambanivohitra moa izay. Ary izany zavatra izany, zavatra mampieritreritra ry havana malala : fa iza marina no andehanan’ny olona aty am-piangonana ? Iza marina no tena antony manentana sy fanoitra manentana antsika eo amin’izay mety ho fanompoana an’Andriamanitra ? Fa raha adinontsika fa Jesoa Kristy no lohan’ny Fiangonana, ary Izy no tompon’ny finoantsika sy manefa azy, dia diso ny iraka nampanaovina antsika. Ary izaho dia niteny an’izany, tamin’ny Fiangonana nentiko farany talohan’ny naha-filohan’ny Fjkm ahy, rehefa voatendry hitondra tao aho: izao ry havana malala hoy aho, « tandremo sao dia tia tia ahy eo an ! Jesoa ihany tiavina. Izaho akory tsy miteny aminareo hoe ankahalao aho dia hiadio dia vakio ny vavako ; tsy miteny an’izany aho, fa milaza aminareo aho : tsy izaho no tokony ho tiavina, Jesoa ihany no tiavina, ary Jesoa ihany no tena ametrahana ny fo ». Ny Mpitandrina mety mandalo, ny Mpitandrina mety maty, ny Mpitandrina manafintohina sns… Aza apetraka amin’ny Mpitandrina ny fonao fa apetrao amin’i Jesoa Kristy irery ihany. Ary manana adidy lehibe amin’izany isika mpitondra. Taomy hibanjina an’Andriamanitra sy Jesoa Kristy ny olona. Izay ny voalohany.

Ny hafatra faharoa ho an’ny Mpitandrina dia izao :
2. Taomy ho any an-danitra ny olona
Ny zavatra hita eto mantsy ry havana malala, dia izao, manao hoe : ny fahitana hitan’i Jaona dia izao : indreo hoy izy misy olona betsaka tsy tambo isaina, ary ireo olona ireo olona avy amin’ ny firenena samy hafa, fokom-pirenena samy hafa, avy amin’ny fiteny samy hafa, olona tsy ankanavaka mihitsy, tonga avy any mankeo anoloan’ny seza fiandrianana sy eo anoloan’ny Zanak’ondry. Ary izany no iraka fototra izay nanirahana antsika, mba hitaona olona ho any an-danitra, ary hitaona maro araka izay azo atao. Tsaroako eto ny tenin’ny mpanoratra anankiray, rehefa milaza ny iraka ampanaovina antsika amin’ny maha-mpanompon’Andriamanitra ; Pasteur Ramaholimihaso Solofo moa dia, ataoko fa tsy hanahirana azy ny hitenenako an’izany, somary zana-bazaha ihany, dia teneniko araka ny teny ahazoany azy tsara ilay izy. Hoy ilay mpanoratra manao hoe : « Notre mission, c’est dépeupler l’enfer pour peupler le ciel ; dépeupler l’enfer pour peupler le ciel ». Izany no izy. Taomy ho any an-danitra ny olona, mba indray andro any, hisy olona betsaka avy eto Isotry Fitiavana hitsangana eo anoloan’ny seza fiandrianana sy eo anatrehan’ ny Zanak’ondry. Izany no fifaliana, izany no tanjona lehibe indrindra tsy maintsy ao am-pon’ny mpanompon’Andriamanitra raha irahina. Ny zavatra lehibe izany ry havana malala, ny antony tokony ampatsiahivana an’izany, dia satria misy fakam-panahy makadiry mahazo izao taranaka indray mira izao ry havana : ohatran’ny hameno Fiangonana no mahamaika ny olona sasany : andao atao izay hahafeno ny Fiangonana, andao atao izay hahafeno ny Fiangonana ; zavatra tsy ratsy ho ahy izany, tsy ratsy ho ahy izany ; fa ny fanontaniana dia izao, manao hoe : olona mameno Fiangonana ireo sa olona hameno ny lanitra ? Ary izany fanontaniana izany ry havana malala, fanontaniana tsy azontsika hidivirana izany, fanontaniana tsy azoko hidivirana izany amin’ny maha-Mpitandrina sy tompon’andraikitry ny Fiangonana ahy. Tsaroako, tamin’ny Fiangonana nentiko tamin’izany fotoana izany, nanana vahiny frantsay izahay, ilay antsoina hoe VSN, Volontaire du Service National, dia tanora miasa aty Madagasikara izy ireo, miasa eo amin’ny sehatra samihafa dia teo amin’ny Sekoly izay niasanay. Dia niangona ny Alahady, dia hoy izy tamiko ny Alatsinainy : « Pasteur hoy izy, tena gaga mihitsy aho mijery, trano ngeza be ny trano Fiangonana nisy anay tamin’izany fotoana izany, feno ilay Fiangonana : tena gaga hoy izy, tena feno ilay Fiangonana ; ny Fiangonana hiaviako hoy izy, avy any Frantsa, zara raha misy olona efa antitra, fotsy volo, manomana ny mandrakizay-ny no mba mameno ny dabilio an’izany Fiangonana izany, ary tsy mahafeno akory aza ny Fiangonana. Ny anao hoy izy ity feno isaky ny Alahady ». Misaotra an’Andriamanitra hoy aho. « Fa misy fanontaniana hoy izy tiako atao aminao Pasteur ». « Eny hoy aho, inona ny fanontanianao ? » Ny fanontaniako hoy izy dia izao : « ireo olona vitsivitsy niara-nivavaka tamiko tany Eoropa ireo, tena vitsy mihitsy ireo, saingy tonga isak’Alahady mivavaka ireo, tonga ao am-piangonana izy ireo, mitondra Baiboly rehefa handeha hiangona e, tonga mivavaka eo. Rehefa mijery azy ireo ny mpiara-belona dia ohatrany olona sampona izy ireo : inona koa ireny, handeha hivavaka rehefa Alahady, indry ary toa mitondra Baiboly ; izany hoe eo imason’ny mpiara-belona taminay hoy izy, dia ohatrany olona sampona izahay, hoe mbola mivavaka rehefa Alahady, mbola mandeha miangona ihany rehefa Alahady. Satria ny mpiara-belona aminay, tsisy dikany aminy izany Alahady izany, tsisy dikany aminy izany mivavaka izany ; ny olona miara-belona aminay, naman’ny tsy misy Andriamanitra ao anatin’ny fehin-kevitr’izy ireo. Fa ireny olona ireny, mandeha mamonjy Fiangonana ara-dalana, mivavaka ara-dalana, satria ao anatiny ao misy faharesen-dahatra manao hoe : izaho tsy velona raha tsy mivavaka ; izaho tsy velona raha tsy miaraka amin’i Jesoa. Izany hoy izy ny faharesen-dahatra ; ireo olona vitsivitsy ao anatin’ny Fiangonana makakakaka tsy mahafeno ny dabiliom-piangonana ireo, manana faharesen-dahatra lalina toy izany hoe izaho tsy velona raha tsy manana an’i Jesoa sy mivavaka. Ny fanontaniko aminao hoy izy Pasteur, dia izao, manao hoe : ianao ve afaka milaza amiko hoe : ireo olona mameno ny trano Fiangonana entinao ireo, manana faharesen-dahatra ohatran’izany koa ? ». Dia nangina aho. Koa inona moa no lazaiko eo ? Hoy aho hoe : « ry zareo anontaniana ». Ka tsy izaho anie no iantefan’izany e, ianareo anie izany anontaniana izany e. Ianareo ve raha mameno ny trano Fiangonana, noho ny faharesen-dahatra ao anatinareo ve, manao hoe, hoe izaho tsy velona raha tsy manana an’i Jesoa, fa Jesoa no anton’ny ahavelomako, tahaka an’ireo olona vitsivitsy ireo, hoy izy ? « Izy anontaniana hoy aho ; izy anontaniana fa tsy izaho ». Ny anjarako dia mitaona ny olona ho any an-danitra, ary iraka lehibe izay atao izany.

Ny hafatra fahatelo farany ho an’ny Mpitandrina dia izao :
3. Taomy hanaiky ny fahefan’Andriamanitra ny olona
Marihin’i Jaona manokana eto ry havana amin’ilay fahitana ny teny hoe : nitsangana, eo anoloan’ny inona hoy izy ? Eo anoloan’ny seza fiandrianana. Ny seza fiandrianana ry havana malala dia milaza ny fahefana, ny maha-Mpanjaka an’Andriamanitra, tena Mpanjaka Andriamanitra, tena Tompo Andriamanitra. Ka ny iraka fototra anirahana antsika dia ny hitaona ny olona hanaiky izany fahefan’Andriamanitra izany, tena hanaiky ny maha-Tompo marina tokoa an’Andriamanitra Ray, izay nanambara ny tenany tao amin’i Jesoa Kristy, ka hanaiky marina an’i Jesoa Kristy ho Tompo eo amin’ny fiainany.
Ao anatin’ny fanekena izay ataon’ny Mpandray ny fanasan’ny Tompo Fjkm ry rahalahy sy anabavy malalako, dia manomboka amin’izao teny izao, manao hoe : « manaiky marina sy mino aho, fa Jesoa no Tompoko sy Mpamonjy ahy ». Jesoa no Tompoko sy Mpamonjy ahy. Izany hoe misy toetra anankiroa izay amantarana manokana an’i Jesoa : Tompo sy Mpamonjy, na Tompo sy Mpanavotra. Ny zavatra mahafinaritra dia izao : tena tian’ny olona mihitsy i Jesoa amin’ny maha-Mpamonjy sy Mpanavotra Azy, tena tiako mihitsy Jesoa. Tiako Jesoa r’ireto fa tena Mpamonjy an, tiako Jesoa fa tena Mpanavotra an, ka mamonjy ahy Izy : raha ohatra ka marary aho dia sitraniny ; raha manana olana aho dia vahany ; tsy manana asa aho fa very asa dia omeny asa ; tsy manana vady aho dia omeny vady e ; tiako Jesoa fa Mpamonjy ahy. Ie ; fa ny zavatra tsy maintsy eritreretina tsara, dia izao, manao hoe : sao mandeha ila ohatran’ny kiraron’i bemonahy ary ny finoantsika, ka Jesoa Mpamonjy ihany no tadiavina, Jesoa dokotera, Jesoa vaha-olana? Hoe tsy mihinana aho dia manome ahy sakafo Izy, tahaka ny zavatra nitranga tamin’ny andro: andao tadiavina atao mpanjaka rangahy iny, fa tsisy mihetsika isika rehetra, mofo dimy sy trondro firy moa ? dia voky isika dimy arivo. Ndry, aiza indray ianao no ahita président an’ny Repoblika ohatran’izany ! Mora daholo ny vary, mora daholo ny trondro ; ny andron’i Jesoa izany resahiko izany an. Andao atao mpanjaka io, andao atao mpanjaka io. Fa sao dia mandeha ila ny finoantsika ? Jesoa Mpamonjy toa izany ; fa rehefa tonga eo amin’ilay hoe Jesoa ekena ho Tompo, eo, dia manjary baraingo ry havana malala. Tena vonona hanaiky an’i Jesoa Kristy ho Tompo ve ny olona izay tezaintsika ato anatin’ny Fiangonana, ny olona izay misoratra ato amin’ny Fiangonana : tena vonona hanaiky an’i Jesoa ho Tompo ve ? Fanontaniana tena mampieritreritra izany ry havana malala, fanontaniana tena mampieritreritra, hoe : hatraiza ny fankatoavana ny fahefan’i Jesoa Kristy eo amin’ny fiainanan’ny olona ? Hatraiza ? Ohatra efa noresahiko teto aminareo izany, fa tsy maninona, tsy mahadiso ahy ny manao teny averina fa mahatsara anareo : hoy ny Apostoly Paoly, ary satria tsy misy Paoly andrasana intsony, dia izaho no mamerina azy : efa niteny taminareo aho hoe raha mieritreritra anie isika izao ohatra e, ny fahefan’iza marina ohatra no miasa ao anatin’ny tokantranontsika, ao anatin’ny tokantrano misy antsika ? Ohatra : ny Fiangonana dia mitaiza antsika mandrakariva ny amin’ny hoe ao anatin’izany tokantrano kristiana izany anie tokony mba hanam-potoana isika mba hihaonantsika amin’ny Tompo e, dia miaraka mivavaka isika, miaraka mandray ny tenin’Andriamanitra isika, raha tsy handray afa-tsy izay ohatra anankiray izay fotsiny aho. Fampianarana efa nomena izany, ary efa hatramin’ny ela, tarazo protestanta efa hatramin’izay izany ry havana malala, eny efa hatramin’ny taon-jato faha 16 akory aza, izany fiaraha-mivavaky ny mpianakavy izany. Fa manao ahoana anefa ny fiaraha-mivavaky ny mpianakavy kristiana ankehitriny ? Manontany tena ianao : miaraka mijery télé eo izy rehetra, miaraka misakafo eo, dia miteny ny anankiray hoe andao atao amin’izay ilay fiaraha-mivavaka, « aoka aloa fa izaho mbola mijery vaovao » ; dia mandeha kelikely, tapitra ny vaovao, andao, « izaho mbola mijery film » ; dia ny hiafarany, « an an an, izaho hatory fa reraka ». Dia ny hiafarany dia ny télé no nibaiko fa Jesoa nandefitra. Any amin’ny tokantranonareo moa tsisy an’izany mihitsy, izay no mahafinaritra ; fa any amin’ny tokantrano sasany, ankoatry ny anareo, dia izany no zavatra mitranga : ny télé no tompo mibaiko ao anatin’ny tokantrano, ny télé tsy maintsy alefa, ny télé tsy maintsy jerena, ny télé tsy maintsy henoina, Jesoa mahazo mandefitra : na tsy hiara-mivavaka aza isika mianakavy, na tsy misy famakiana Baiboly aza anio, ny télé tsy azo pihina. Izany no mitranga, any amin’ny tokantrano hafa, ankoatry ny anareo hoy aho. Dia eo ny fanontaniana : h atraiza marina ny fanekentsika hanaiky an’i Jesoa ho Tompo, ny fahefan’Andriamanitra ao anatin’ny fiainana? Azoko hitarina lava izany, ry havana malala, fa hijanona eo aho.
Dia izay ny hafatra Pasitera an :
- Voalohany : Taomy hibanjina an’Andriamanitra sy Jesoa ny olona
- Faharoa : Taomy ho any an-danitra ny olona
- Fahatelo : Taomy hanaiky ny fahefan’Andriamanitra ny olona
Izaho ohatrany mba te hangataka kely, hanao exercice kely miaraka aminareo Fiangonana. Ianareo izany izao no mba miaraka amiko e ! Mba miaraka miteny amin’i Pasitera, dia izao no lazaina : Pasitera ô, taomy hibanjina an’Andriamanitra sy Jesoa ny olona ; na hoe : taomy hibanjina an’Andriamanitra sy Jesoa izahay. Azonareo moa izany zavatra asaiko teneninareo izany ? Andao ary, averina ny volaohany, isa, roa, telo : « Pasitera ô, taomy hibanjina an’Andriamanitra sy Jesoa izahay ».
Dia tononiko ilay izy dia averinareo indray ny faharoa : « Pasitera ô, taomy ho any an-danitra izahay » ; dia ny fahatelo : « Pasitera ô, taomy hanaiky ny fahefan’Andriamanitra izahay ». Henonao izany Pasitera an ? Ndry, mahafinaritra ery ny mahita an’i Pasitera mitsikitsiky ; ka ny Fiangonana entinao ve no miteny an’izany, tena tretrika mihitsy ianao !
Fa inona ary ny hafatra ho an’ny Fiangonana ?

II. Hafatra ho an’ny Fiangonana
Manana hafatra telo avy amin’Andriamanitra ho an’ny Fiangonana aho, fa omeko aloa ny foto-kevitra. Izao ilay izy ry havana malala : maneke ianareo Fiangonana ho Kristiana MMM – Kristiana MMM, araka izay hitantsika eo hoe : miakanjo fotsy lava, mitana sapam-drofia ary midera an’Andriamanitra. Kristiana MMM.
Fa toa inona no toetran’izany ? Ireto no toetra telon’izany kristiana MMM izany ry havana :

1. Madio
Ny zavatra izay hitantsika eto ry havana, rehefa milaza izy manao hoe : ireo olona ireo nitsangana teo anoloan’ny seza fiandrianana sy teo anatrehan’ny zanak’ondry niakanjo akanjo fotsy lava ; io akanjo fotsy lava io, dia akanjo madio. Ary inona no antony nampahadio azy ? Azavainy ery amin’ny and. 14. Mbola misokatra moa ny Baibolinareo ? Ny sasany moa dia maika ery hanakombona azy ; fa izay mbola manana ny azy misokatra eo anatrehany, andao anie vakiana ilay Apokalypsy 7 :14, amin’ny anaran’i Jesoa manao hoe : « Fa hoy izaho taminy: Tompoko, hianao no mahalala. Dia hoy izy tamiko: Ireo no avy tamin’ ny fahoriana lehibe, ary ny akanjony nosasany sy nofotsiany tamin’ ny ran’ ny Zanak’ ondry ». Manana akanjo madio izy ireo ; madio satria nosasany sy nofotsiany tamin’inona ? Tamin’ny ràn’ny Zanak’ondry, izay manambara amintsika, ary izay no mahatonga an’ilay hoe nitsangana teo anoloan’ny Zanak’ondry izy, satria io Zanak’ondry io, izay manambara an’i Jesoa Kristy, araka ny fanoroana mazava nambaran’i Jaona teo amin’ny fiandohan’ny iraka nampanaovina an’i Jesoa manao hoe : « indro ny Zanak’ondrin’Andriamanitra, izay manaisotra ny fahotan’izao tontolo izao ». Ary ilay Zanak’ondry, manambara ny Zanak’ondrin’ny Paska, ka ny ràny natao teo amin’ny tahotahom-baravarana sy ny tolana no niaro izay rehetra tao an-trano tsy iharan’ny fahafatesana ; io ràn’ny Zanak’ondry io, mbola azoko sy azonao ialofana ; mbola azoko sy azonao ianteherana mba hanadiovana ho afaka amin’ny heloko rehetra, ka tsy misy fahotana maro loatra mety ho nataoko, tsy misy fahotana ratsy loatra mety ho nataoko, tsy misy fahotana ela loatra mety ho nataoko ; fa ny ràn’ny Zanak’ondry, ampy tsara hanadio ahy, handraisako ny famelan-keloka, tolo-botsitra sy manontolo avy amin’Andriamanitra. Izany ry havana ny vaovao mahafaly. Ka antsoin’Andriamanitra isika ho Kristiana madio, hanaiky sy hino izany famonjena notanterahin’Andriamanitra ho antsika ao amin’i Jesoa Kristy, nandatsaka ny ràny ho antsika teo amin’ny hazo fijaliana izany. Ary ny fanekena an’izany ry havana malala no andraisana ny tena fiadanana ao anatin’ny fiainana marina. Isika dia malagasy, ary manana ny teny manao hoe : aleo henjehin’ny omby masiaka toy izay enjehin’ny fieritreretana. Marina izany. Fa olona firy moa no mivadibadika eo amin’ny fiainana, enjehin’ny fieritreretany ny amin’ny ratsy rehetra natao ; Fa antsoin’Andriamanitra isika hoe : ianao io, afaka hanana ny fiadanana marina ianao raha miverina eo am-pototry ny hazo fijaliana, eo amin’ny ràn’ny Zanak’ondry indray, handray ny famelan-keloka ka ambaran’Andriamanitra aminao, n’inon’inona fahotana nataonao, na firy na firy fahotana nataonao, na toa inona na toa inona izany fahotana nataonao izany, rehefa tonga eo hibebaka ianao, rehefa tonga eo hibebaka marina ianao, dia hiteny aminao Izy manao hoe : « Izaho koa tsy manameloka anao, mandehana soa aman-tsara ary amin’izao sisa izao, aza manota intsony ». Izany teny famelan-keloka izany no tian’Andriamanitra omena ahy, tian’Andriamanitra omena anao izany.
Ny fahadiovantsika ry havana malala dia fahadiovana omena antsika rehefa manaiky hibebaka marina isika ; ary izany no tian’Andriamanitra iainantsika : meteza re ho Kristiana madio e ! Meteza re ho Kristiana madio e !
Ny zavatra mampieritreritra ry havana malala dia izao : na dia atolotr’Andriamanitra aza izany famonjena sy fanadiovana amin’ny ràn’i Kristy izany, ny zavatra mampieritreritra dia izao : marina mandrakariva ilay teny ao amin’i Jaona manao hoe : « Tonga teo amin’ny olona ny mazava, kanefa naleon’ny olona ny maizina, satria ratsy ny asany ». Ny fahadiovana efa eo, fa minia mijanona ao anatin’ny loto ny olona, tena mijanona ao anatin’ny loto mihitsy ; ary zavatra mampieritreritra izany, tena mampieritreritra : maninona no mifidy hijanona ao anatin’ny loto ianao e ? Maninona ianao no mijanona ao anatin’ny haizina kanefa efa tonga ny mazava ? Maninona ianao no mijanona ao anatin’ny ratsy kanefa efa tonga ny fahatsarana ? Maninona ianao no mijanona ao anatin’ny fahaverezana kanefa efa tonga ny famonjena ? Zavatra mampieritreritra lalina dia lalina dia lalina izany ry havana malala. Tena lalina mihitsy. Tokony hieritreritra an’izany isika, ary eritreritra tokony ho velona manokana amin’izao fotoanan’ny karemy sy ny fandinihan-tena izao, hoe, rehefa nomena anie Jesoa e, ny antony nanolorany ny tenany, nijaliany, ny nahafatesany anie ka noho io faharatsiana sy io loto ilomanosako mahatamana ahy io, tohizako ; efa fantatro izao fa ratsy mbola tohizako ihany. Io anie no antony nahafaty an’i Jesoa e. Ny epistily ho an’ny Hebreo dia miteny teny mahery mihitsy manao hoe : raha ilomana toy izany, izany faharatsian izany, miverina manombo indray ny Zanak’Andriamanitra eo amin’ny hazo fijaliana ianao.
Meteza re mba ho Kristiana madio e ! Dia mba hiala tokoa amin’izay fantatra fa ratsy. Betsaka ny zavatra fantatry ny olona fa ratsy, raha mijery izao isika eto Madagasiakara, ny zavatra mitranga dia izao, manao hoe : atao foana ny sonia ; omaly izao vao nisy sonia indray nataon’ny sehatra anankiray tamin’ny Bianco hoe hiady amin’ny fahalovana isika ; ie, efa 30 taona lasa Pasteur Razafiarison Emilien no niantsoantso hoe andeha re isika hanao ny chaîne d’honnêteté e, ilay tohivakan’ny fahamarinana, mba hiady amin’izany fahalovana izany. 30 taona aty aoriana, mbola manontany tena ihany ianao hoe aiza ihany ary izany ady amin’ny fahalovana izany ; nefa ny olona manao an’io fahalovana io, dia olona tompon’andraikitra samihafa. Ary ireo olona tompon’andraikitra ireo, tsy vitsy amin’ireo no Kristiana, tsy vitsy amin’ireo no Kristiana. Dia manontany tena ianao manao hoe : nahoana no omena ny fahadiovan’i Kristy kanefa mijanona ao anatin’ny loto ihany ny olona : rehefa Alahady izy dia mipetraka tsara ato am-piangonana, Kristiana masina sy soa, fa rehefa any ivelany izy dia jiolahy tokoa. Ary izay izany ny olana, izay ny olana. Fa raha mba tahaka ny toetran’ny olona ato am-piangonana ny toetran’ny olona any amin’ny birao rehetra sy ny toeram-piasana rehetra, hiova ny fiainan’ny firenena. Fa eto am-piangonana izy madio, fa rehefa any ivelany izy, apetrany tsara ato am-piangonana ilay akanjo fotsy, dia tonga amin’ny tenin’ilay rangaha anankiray nalehan’ilay Mpitandrina. Hoy ilay Pasitera tamiko : saika vaky ny foko hoy izy. Inona no nitranga hoy aho ? « Nandeha aho ny Alatsinainy namonjy birao ; hoy ny olona : ah, diakona ilay olona miasa ao amin’io birao io ». « Misaotra ny Tompo hoy aho ». Dia niteny : « izaho moa, hoy aho, tompoko, manana olana ohatran’izao, izao tsy manana eritreritra mihitsy hanao risoriso sy kolikoly aminao, fa ampio aho ahoana no anaovana azy io ». Ny valintenin’ilay rangaha diakona dia izao, manao hoe : « azafady Pasitera, tena Pasitera mihitsy ianao, fa tsy diakona aho eto no resahinao ». Andriamanitra ô ! Tena tsotra fotsiny. Saika tsy hitako ny varavarana nivoahana hoy ilay Pasitera. Hay moa izany no fanaon’ny olona sasany ; ianareo moa tsisy manao an’izany. Izany no fanaon’ny olona sasany : ato am-piangonana, diakona aho eto, mpandray ny fanasan’ny Tompo aho eto, Kristiana aho eto ; fa rehefa tonga ary aho an, azafady an, tsy Kristiana aho eto an, tsy Kristiana aho eto an.
Meteza re ho Kristiana madio e ! Izay ny M voalohany. Ny M faharoa : Mendrika

2. Mendrika
Taiza ary no nahitako an’izany teny izany ? Ao amin’ny Apokalypsy 3 :5 izay miresaka manokana ity resaka akanjo fotsy ity. Avadiho kely ny Baibolinareo rahavako, Apokalypsy 3 :4-5 : nanoratra ho an’ny Fiangonana tany Sardisy ny Tompo. Ny and. 4 sy 5. Ahoana no voasoratra ao, amin’ny anaran’ny Tompo : « Kanefa misy olona vitsy atỳ aminao atỳ Sardisy izay tsy nandoto ny fitafiany; ary hiara-mandeha amiko mitafy lamba fotsy ireo, satria miendrika Izy » ; hatreo. « Satria miendrika Izy » : izany ry havana no toetra andrasan’Andriamanitra amintsika : mendrika izy.
Ary inona no dikan’izany fahamendrehana izany ? Io ambaran’i Jesoa io, hoe : tsy nandoto ny fitafiany. Ny dikany izany, dia izao, manao hoe : miara-miaina eo anivon’ny olona maloto izy, miara-miaina eo anivona fiaraha-monina maloto izy, saingy nijoro izy ka tsy nanaiky handoto ny fitafiany. Ary ny olona ohatran’izany ry havana, no tian’Andriamanitra ho hita ihany koa. Tsy hoe maloto ianao teo aloa, dia nadio ianao ; izay mantsy ny dikan’ilay hoe madio. Tsy izay fotsiny ; fa izao : rehefa madio ianao, dia aza miverina maloto intsony. Ny olona mendrika dia izay efa miakanjo akanjo fotsy izy, dia miaro ny tenany tsy haloto. Ny Soratra Masina ry havana malala dia manan-karena ohatra mahafinaritra ny amin’izany : ohatra, handray ohatra iray aman-droa fotsiny isika : ohatra : malaza izany lehilahy anankiray antsoina hoe Noa izany. Ny fiaraha-monina nisy azy, fiaraha-monina izay naha-tofoka tanteraka an’Andriamanitra ka nilazany hoe efa tonga hatrany an-danitra ny fahavetavetan’ny mpiara-belona ka aringako ireo mponina ireo. Saingy Noa, hoy ny Soratra Masina, nahita fitia tamin’Andriamanitra : miara-miaina amin’ny olona lo, miara-miaina amin’ny olona tsy vanona, nefa vanona. Azo atao izany ry havana. Fa tsy hoe akory hoe tsy vanona daholo ny olona dia aleo koa aho mba ho tsy vanombanona. Tsy izany : mahazo mandeha amin’ny adalana daholo ny olona, fa ianao afaka mijoro ho hendry. Mety miteny ny olona : « ianao koa mba miana-kendry, tsy ampahafirin’izay Kristiana », satria misy mahazo an’izany mihitsy an. Dia ahoana hoy aho no ataonao ? Marary kely ihany ny foko hoy izy : tsy maninona e, tsy maninona. Avelao ny olona hiaina ao anatin’ny fahadalana, fa ianao, mijoroa amin’ny fahendrena. Aleo ny olona hiaina ao anatin’ny fahalotoana, fa ianao, mandehana amin’ny fahadiovana. Aleo ny olona hiaina amin’ny ratsy, fa ianao, mijoroa amin’ny tsara. Izany ny olona mendrika ry havana malala. Ary miandry olona ohatran’izany koa ny Tompo. Fa misy olona betsaka anie, atao ny Tafita Masina, « ianao ve handray ny Tompo ? », « Izaho nandray ny Tompo, izaho efa nanolo-tena ho an’i Jesoa, izaho efa nanaiky an’i Jesoa ho Tompo sy Mpamonjy ahy, izaho efa olom-baovao ». Olom-baovao hatraiza anefa ? Hatreto (molotra) : rehefa tafaverina miaraka amin’ny namana mpiteny ratsy, dia miteny ratsy ihany ; rehefa tafaverina amin’ny namana mpisotro toaka, eny e, ianareo misotro iray tavohangy fa izaho hisotro iray vera e.
Kristiana mendrika no andrasan’Andriamanitra ry havana malala. Hamarana azy aho. Ny M fahatelo, dia ilay voambara ao amin’io Apokalypsy 3 io ihany, ilay and.5. Ahoana no voasoratra ao amin’ny anaran’ny Tompo ? « Izay maharesy dia hitafy lamba fotsy tahaka ireo koa, ary tsy hamono ny anarany eo amin’ ny bokin’ ny fiainana tokoa Aho, fa hanaiky ny anarany eo anatrehan’ ny Raiko sy eo anatrehan’ ny anjeliny ». Izay maninona hoy izy ? Izay maharesy. Ary izay no izy ry havana malala : Maharesy.

3. Maharesy
Tsy Kristiana madio fotsiny, tsy Kristiana mendrika fotsiny, fa Kristiana manao ahoana koa ? Maharesy. Ary inona moa no dikan’izany ? Efa niteny an’izany teto aminareo teto koa aho, ianareo mantsy izao no anisan’ny Fiangonana voavangivangy matetika an, ary mialona kely anareo mihitsy ny sasany, fa tsy maninona, fa izay moa izany ny programan’ny Tompo ; efa niteny an’izany taminareo aho : matoa misy resaka hoe maharesy (satria efa nanazava teto ny teny fanevanareo aho mantsy) ; tsy misy fandresana raha tsy misy ady. Izay no izy : tsy misy fandresena marina raha tsy misy ady. Ka raha maharesy dia nisy ady natrehina izany. Tsy fandresena mihitsy, ny olona manao baolina, manao hoe : ahoana ianareo tao ? Izahay nandresy. Fa naninona ? Tsy tonga ny ekipa adverse. Tsy fandresena izany, tsy fandresena izany. Ny fandresena dia izay azo avy amin’ny ady ihany. Ary io no tena fandresena, io no tena fandresena ambaran’ny tenin’Andriamanitra : ny fandresena izay niaretana ny mafy, nihatra hatramin’ny aina mihitsy. Fa raha tsy fandresena ohatran’izany, tonga amin’izay lazain’i Georges Andriamanantena, Rado manao hoe : « Tsoka tsy namakin-taolona ka kely maso-karena ». Izany no izy ry havana. Ary ianareo zana-bazaha, mahay tsara ny teny tao amin’ny Le Cid fahiny izany, « A vaincre sans péril, on triomphe sans gloire ». Fandresena tsy nanano sarotra, fandresena tsy misy voninahitra. Ary izany no izy ry havana malala, ka raha antsoina isika ho Kristiana maharesy, dia antsoin’Andriamanitra koa izany isika ho Kristiana vonona hiatrika ady. Ary raha vao ady no resahina, mifanatrika amin’ny fahavalo ianao, miaritra ny mafy ianao, tonga daholo ny famelezan’ny fahavalo rehetra hamely anao, dia ataony izay haha-potika anao, ataony izay haha-simba anao ; izany ny zavatra kendren’ny fahavalo. Dia miaritra ianao amin’izany rehetra izany : misy fahoriana ao, misy fijaliana ao, misy adin-tsaina ao, misy tebiteby ao, misy ranomaso ao, saingy mijoro ianao, fa tsy hiteny manao hoe : « Jesoa ô, tsy nampoiziko ho mafy ohatran’izao izy ity ». Izay no izy. Dia inona no tohin’izay, raha tsy nampoizinao ho mafy, dia hiverina any amin’ny devoly ??? Hiverina any ve ianao ? Ary izany mihitsy no fanontaniana nataoko tamin’ny zanako ara-panahy anankiray : Pasitera hoy izy, hatramin’ny nanolorako tena ho an’i Jesoa, ohatrany be problème aho an ! Eny anaka hoy aho, izaho anie efa nampianatra anareo katekomena niteny an’izany e, izaho no nambaran’i Jesoa tamiko, ambara aminareo : « aty amin’izao tontolo izao no hahitanareo fahoriana ». Izy tsy niteny hoe : aty amin’izao tontolo izao no hahitanareo fifaliana. Tsy niteny an’izany Izy hoy aho ; aty amin’izao tontolo izao no hahitanareo fahoriana : Izy anie efa nampiomana e ! Izy efa nampiomana, ka raha mahita fahoriana ianao izao, ny zavatra tokony ambaranao anaka dia hoe « Aleloia, marina ny teninao Jesoa fa mahita aho ity ! » Fa tsy hoe : « Jesoa, inona ary ity ? ». Ilay nolazainy ihany anie io hitanao io e. Saingy izao anaka hoy aho, ny tohin’ny teny : « aty amin’izao tontolo izao no ahitanareo fahoriana, nefa matokia Izaho efa naharesy izao tontolo izao ». Ny fandresen’i Kristy dia momba anao ao anatin’io zavatra sarotra io, fa izao fotsiny ny fanontaniana manao hoe : vonona mbola hifikitra amin’i Jesoa ve ianao mandra-panehony ny fandresena?
Manomboka anio ny herinandro masina ry havana malala, mety tonga eto amin’ny andron’ny sampan-drofia ianao izao, fotoana mbola misy fiderana ; fa andro vitsivitsy aorian’izao, dia hosamborina ny Tompo dia hitsaoka avokoa ny mpianany rehetra. Ianao koa mety handalo lalana toy izany, izay hahatonga anao hifanehitra amin’ny fanapahan-kevitra sarotra : hiaraka aho sa hisaraka, hiaraka sa hisaraka amin’i Jesoa? Ny zavatra nitranga moa, dia indrisy, dia nitsoaka daholo ny mpianany, dia ny sasany nitsoaka natanjaka, ary ny anankiray nitsoaka nitanjaka. Ny filazantsara araka ny Marka dia mitantara an’izany ry havana, tsy filazantsara piraty mihitsy akory izany resahiko izany, fa hamarino ao amin’ny Baibolinareo izany. Dia eo ianao izany, hitsoaka aho sa hanara-dia an’i Jesoa ? Dia mbola misy moa izany mba nisisisisika ihany, tahaka an’i président Petera, satria président-ny 12 lahy izy ; tonga mba hatreny amin’ny hitsarana an’i Jesoa ihany, saingy nandà an’i Jesoa impiry ? in-telo. In-telo be izao. Président ange io e ! Président Petera io. Fa nandà an’i Jesoa in-telo be izao. Dia eo ianao izany, hifanehitra amin’ny fanapahan-kevitra : handà aho sa hanaiky ? Handà aho sa hanaiky ? Tovovavy kely no niteny hoe ianao koa niaraka taminy ; « tsy fantatro izay lazainao ». Ah ! Telo taona ngarangidina fara-fahakeliny no niarahan’i Petera tamin’i Jesoa : « tsy fantatro izany lehilahy izany ». Mba azonareo sary an-tsaina moa izany ry havana malala, fa izaho koa, ianao koa, mety hahita fotoana sarotra izay hametrahan’ny toe-javatra antsika eo anoloan’ny toe-javatra hanao hoe hanaiky aho sa handà an’i Jesoa eto amin’ity toe-javatra ity ? Avy eo, nentina Jesoa, notsaraina Jesoa tamin’ilay fitsarana tsy marina, ny mpitsara nanambara hoe : tsy hitako ny helok’ity lehilahy ity. Izay ny vokatry ny fanadihadiana rehetra natao, ny didim-pitsarana nivoaka : ento Izy ka omboy amin’ny hazo fijaliana. Ah zalahy e ! Fitsarana izany ! Eto Madagasiakara moa tsy misy fitsarana ohatran’izany, fa tamin’ny andron’i Pilato, izany izany ny fitsarana niseho ; izany ny fitsarana niseho. Olona tsy manan-tsiny izao, dia helohina, ombohona amin’ny hazo fijaliana. Dia Jesoa tsy niteny. Fa dia nanaiky Izy, nangiana, moana tahaka ny ondry vavy teo anoloan’ny mpanety azy, nohombohona teo amin’ny hazo fijaliana. Ary mety hahita toe-javatra ohatran’izany ianao, hoy Jesoa : maninona ianao no nangiana e ? Tsy rariny ange izao e ! Maninona ianao no mangiana ? Mandefitra fotsiny izao ? Maninona ary ireo no avela hanao izay tiany atao amin’ny adalany eo dia ianao mieritra eo fotsiny? Jesoa mangiana, Jesoa mangiana. Ary mety handalo an’izany koa isika ry havana malala : fiaretana izay iantsoan’Andriamanitra antsika izany. Ny zavatra mahafaly ry havana malala dia izao : io Jesoa nangiana io, nohombohona teo amin’ny hazo fijaliana, ary teo afovoana jiolahy anankiroa ; ny jiolahy anankiray, jiolahy nibebaka, nilazany hoe : Anio no hihaonanao amiko any Paradisa. Ny anankiray jiolahy tsy nibebaka, mbola nilaza manao hoe : raha afaka hamonjy ny tenanao ianao, dia vonjeo ny tenanao dia vonjeo koa izahay. Ary izany no izy ry havana malala, izany ny zavatra atrehintsika mandrakariva, atrehintsika mandrakariva : Jesoa Kristy hatreo amin’ny fara-fofonainy, mbola vonona hamonjy. Saingy Jesoa Kristy hatreo amin’ny fara-fofonainy, mbola notevatevaina. Izany ange ny Jesoa antsika e. Ary ianao, raha vonona hiaraka amin’i Jesoa, dia mivonona koa hahita an’izany. Fa ny vaovao mahafaly dia izao : tsy nifarana teo an-tampon’i Kalvaria ny tantara, tsy nifarana teo amin’ny sahan’i Josefa avy any Armatia, nandevenana an’i Jesoa ny tantara ; fa nitohy ny tantara ary niposaka maraina koa ny Paska nanehoan’Andriamanitra fa nandresy Jesoa Kristy ; ary izaho koa, ianao koa, azony entina eo amin’izany fandresena izany dieny ankehitriny, fa tsy miandry ho any amin’ny mandrakizay akory. Azon’Andriamanitra ho entina amin’izany isika ; ka izay maharesy, maharesy satria nandresy ny fahotana noho ny ràn’i Kristy, ka nandray ny fahadiovany, ary nandresy ny fakam-panahy rehetra ianan’ny mpiara-belona aminy izay azony nihosonana foana, fa niady tamin’ireny, ka nijoro teo anivon’ireny faharatsiana ireny, tahaka ny nijoroan’i Noa, hoy aho taminareo teo, izany olona maharesy izany, ka tsy mihemotra mba hamonjy ny ainy, fa vonona hamoy ny ainy noho ny amin’ny Tompo sy ny filazantsara izany olona izany. Nomen’Andriamanitra koa ny voninahitry ny Fanjakany mandrakizay.
Ry havana malala, misaotra ny Tompo aho fa afaka nizara an’izany taminareo : Kristiana MMM hoy aho no ilain’Andriamanitra. Meteza re ianareo ho Kristiana MMM e ! Inona ireo toetra telo ireo ? Madio – Mendrika – Maharesy.
Ny Fanahy Masina anie hanoratra izany ao am-ponareo ; izaho moa tsy hampiteny an’i Pasitera hoe Pasitera o, avia dia teneno hoe : O ry Kristiana o, mba meteza re ianareo ho madio sy mendrika ary maharesy araka izany tenin’i Président izany. Fa tsy tenin’i Président izany an ! Iraka fotsiny aho eto, manefa ny iraka nampanaovina ahy, hampita aminareo izany hafatr’Andriamanitra izany. Ary hoya ho taminareo indray maka ary averiko indray satria tena mifanojo : tena manantena mihitsy hoe indray andro any, hahita anareo any an-danitra aho dia hiara-mitsangana eo anoloan’ny seza fiandrianana isika.
Amena

"Ary soraty ho amin’ ny anjelin’ ny fiangonana any Smyrna: Izao no lazain’ ny Voalohany sy ny Farany, Izay efa maty, nefa velona indray: Fantatro ny fahorianao sy ny fahantranao (nefa manan-karena hianao), ary ny fitenenan-dratsy ataon’ izay milaza ny tenany ho Jiosy, kanjo tsy izy, fa synagogan’ i Satana. Aza matahotra izay efa hiaretanao; indro, ny devoly efa hanao ny sasany aminareo ao an-trano-maizina, mba ho voazaha toetra hianareo, ary hanam-pahoriana hafoloana. Aoka ho mahatoky hatramin’ ny fahafatesana hianao, dia homeko anao ny satroboninahitra fiainana. Izay manan-tsofina, aoka izy hihaino izay lazain’ ny Fanahy amin’ ny fiangonana. Izay maharesy dia tsy hosimban’ ny fahafatesana faharoa". Apokalypsy 2:8-11

« Ary tsy misy olona manampina lamba tonta amin'ny tapa-damba tsy mbola voalona; fa ny vaovao izay natampina dia handrovitra ny lamba, ka hitatra ny triatra.Ary tsy misy manisy divay vaovao ao anaty siny hoditra tonta; raha izany, dia ho triatra ny siny hoditra, ka ho raraka ny divay, sady ho simba ny siny hoditra; fa ny siny hoditra vaovao no asian'ny olona divay vaovao, dia miara-maharitra izy roroa. » Matio 9 :16-17

Misy teny miverina in-droa eo ry havana, dia ny hoe : « triatra ». RESAKA TRIATRA

Ohatra roa no ampiasain’i Jesoa amin’ity resaka triatra ity. Ny voalohany dia resaka lamba, lamba na akanjo ; akanjo efa antitra, efa malemy ilay lamba, ohatran’ireny akanjontsika rapa ireny an, dia hakana lamba vaovao atampina azy. Dia hoy Jesoa : tsy mety izany e. Tsy mety ny maka lamba tonta dia atampina amin’ny lamba vaovao mbola tsy voalona, fa triatra io. Izay ilay ohatra anankiray. Ny ohatra faharoa indray, dia hoe amin’ilay siny fasian’ny jiosy divay, siny hoditra osa izy io, dia hoe, amin’ny maha-hoditra azy koa dia arakaraky ny fahanterany dia mihasimba ilay izy. Ary rehefa izy antitra iny no asiana divay vaovao, dia ny filazan’ny mpandinika hoe, ilay divay rehefa mihotrika ao, dia mihamahery, mandroatra, dia mandoaka an’ilay siny hoditra, dia vaky ilay siny, very ilay divay, triatra ilay siny hoditra.

Misy lamba eto izany, triatra ; misy siny eto izany, triatra. Na ilay lamba ry havana, na ilay siny, dia sarintsika mpino. SAO DIA MPINO TRIATRA IANAO ?

Raha ilay sarin’ilay lamba no resahina, ilay izy, ilay lamba aty ivelany : SAO DIA HOE MBA MITAFY AN’I KRISTY IHANY IANAO FA TRIATRA ILAY FITAFIANA, TRIATRA KRISTY EO AMINAO ? Sady tsy hanisy endrika ny fiainanao, ny fiainanao ara-panahy izany, no fijoroana vavolombelona ratsy, hoe triatra ivelany. Fa ilay divay indray, zavatra sotroina any anaty any, dia hoe, milaza hoe iny divay iny tokony hoe hitondra fifaliana mahery vaika ho anao. Izany ilay divay mahery, tokony hitondra fifaliana mahery vaika ho anao ; satria triatra ilay sinin’ny fiainanao, dia tsy mahita fifaliana izany ianao. RESAKA TRIATRA.

Tsy manontany anao ny Tompo amin’izao maraina izao, iza ianao : Pasitera ve ianao, mpiandry ve ianao, diakona ve ianao, mpandray ny fanasan’ny Tompo ve ianao ? Fa hoe, sanatria an’izany, sao dia triatra ianao ?

Andeha ary hojerentsika ilay ohatra voalohany. And. 16 : « Ary tsy misy olona manampina lamba tonta amin'ny tapa-damba tsy mbola voalona; fa ny vaovao izay natampina dia handrovitra ny lamba, ka hitatra ny triatra ». Inona ary ry havana no ao an-tsain’i Jesoa raha miresaka an’ity hoe lamba tonta ity Izy ? Dia avy eo jerentsika hoe inona ary ilay lamba vaovao. Ilay lamba tonta aloa tamin’ny andron’i Jesoa dia tena faran’izay mazava be : io ilay fampianaran’ny raby, fampianaran’ny mpanora-dalàna sy ny fariseo ; ilay fampianarana jiosy efa lany andro ka tokony asolo ny fampianaran’ny filazantsaran’ny fanjakan’Andriamanitra, ny filazantsaran’ny fahasoavan’Andriamanitra, hahasoa azy tanteraka. Tsy hoe tampitampenana kely, hoe tazomina ny an’ny jiosy ohatran’izao dia ampiana filazantsara kely, non ; iny, avalona, asolo ny fampianarana vaovao, lamba vaovaon’ny filazantsara. Mazava be izay tamin’ny andron’i Jesoa ry havana.

Fa ho antsika kristiana malagasy kosa aza, inona no mety hoe lamba tonta tian’i Jesoa hoe ho solointsika izany e? Ary hoe ho soloina ilay izy fa tsy hoe tampenana amin’ny lamba vaovaon’ny filazantsara.

-          Voalohany dia voalohany indrindra ry havana, satria kristiana malagasy isika, dia ilay hoe lamba tontan’ny fahendrena nentin-drazana, ilay lamba tontan’ny fanaon-drazana izay pentin’ny fanompoan-tsampy sy ny fahotana. Ary iny matetika, ary mbola maro, gaga ianao, mbola maro ry havana no mitana an’ilay kolontsaina malagasy miaro fanompoan-tsampy, fa iny no hoe ampiany an’ilay fampianaran’ny filazantsara. Lamba tonta atampina amin’ny lamba vaovaon’ny filazantsara. Gaga ianao ry havana, rehefa mba mandeha amin’ireny hoe sakafo mariazy sy ny karazany, mifanerasera amin’ny olona, mihaino ny resaky ny olona eo amin’ny latabatra manodidina anao eo, tena mbola maro e, ny kristiana mandala an’ilay hoe kolontsaina efa hita izao fa misy fanompoan-tsampy an, dia ampiana filazantsara kely. Eo koa ilay olona indray, mbola tena mpandala an’ilay hoe fampianarana moralin’izao tontolo izao, ny famaritana an’izao tontolo izao dia hoe izao tontolo izao tsy manome toerana an’Andriamanitra. Izany no mahatongaan’io homosexualité sns io, adoption pour tous sy ny karazany, mariage pour tous io ry havana. Izay ilay moralin’izao tontolo izao, etc…

-          Fa ilay lamba tonta anankiray ary tena faran’izay matevina ry havana, dia ilay lamba tontan’ny opinion personnelle-tsika tsirairay. Ny atao hoe opinion personnelle : « ny hevitro », « ny fahitako azy », « ny ahy indray izao », « izao no mety amiko » ; lamba tonta izany, lamba tonta hoy Jesoa izany, tokony esorina.

Ka ilay problema dia izao : ilay tsy mety ange hoy Jesoa dia ianao manana an’izany lamba tonta izany, ireo moa izany no tena hoe tsiahivina amin’izao fotoana izao ; fa dia hoe asianao, tampenanao ilay lamba vao mbola tsy milona. Inona ilay lamba vao tsy milona ? an an an, asianao Jesoa kely ilay fiainanao. Mampatsiahy an’ireny rehefa misakafo any an’anona any, rehefa hoe hanomboka an’ilay fety-na mariazy dia hoe : « asio vavaka kely eo Pasitera aloa an, asio vavaka kely ». Ohatran’izany koa ilay olona, hoe manampina amin’ny lamba vao mbola tsy milona, ilay hoe : « an an an, izaho indray Pasitera, izaho tsy dia pratiquant aloa, izaho tsy dia mba hitanao any am-piangonana, fa izaho indray, izany Alahady fandraisana voalohan’ny volana izany, tsy mi-rate mihitsy aho ». Izay ilay lamba tonta ry havana o, atampina lamba vaovao. « Eny e, izahay indray tsy dia hita any am-piangonana aloa, fa ireo zanako ananky telo kely ireo, efa vita batisa daholo ireo », « marina aloa fa izahay mivady tsy afaka mitondra azy e, any am-piangonana rehefa Alahady maraina dia mbola tsy tanteraka ilay hoe manao izay hahantonga azy ho mpianatra Sekoly Alahady » ; izany ry havana ilay fisainan’ny olona manana lamba tonta atampina amin’ny lamba vao. Etc… « Izaho Pasitera tsy dia miangona an, fa faly kosa aho rehefa mba mandeha mariazy, faly kosa aho rehefa mandeha fandevenana, mahare tenin’Andriamanitra dia mampieritreritra sy mampahery » : lamba tonta atampina lamba vaovao. Hoy Pasitera Rakotonirainy Jhonson, nanoratra hevi-teny volamena momba an’ity filazantsara ity : izao hoy izy : raha izaho ianao, rehefa hoe jentilisa fiainana sy jentilisa fisainana, mijanona ho jentilisa. Fa aza aroaroana filazantsara ny fiainanao. Eny e, raha jentilisa ianao mitafy an’ilay lamba tonta ilay maha-jentilisa, ho simba, ho simba, ho simba anie no iafaran’iny. Fa ny problema hoy Pasitera dia hoe raha atambatrao amin’ilay lamba vaon’ny filazantsara iny, vetivety iny dia ho triatra ary hitatra ny triatra, hitatra malaky ilay triatra, ka aleo tsy manakambana azy ireo. Fa nahoana ? Fa nahoana no hoe malaky triatra ? Manao ahoana ilay hoe hitatra ilay triatra ? Satria ianao, ny fiainanao hifandrohitan’ny devoly sy ny anjely, fiainanao hifandrohitan’ny devoly sy ny Fanahy Masina, dia ho triatra ary hitatra izany hoe triatra izany. Ry havana o, miteny aminao ny Tompo : mandiniha tena ianao sao dia ianao io hoe triatra fitafy io. Sao dia ianao io triatra fitafy io : mba manana an’i Jesoa ihany fa tsy manana an’i Jesoa manontolo, fa manana sombintsombina Jesoa, toa ny lamba vaovao mbola tsy voalona atampinao an’ilay lamba tontan’ny fiainanao ? Triatra ianao ary hitatra izany triatra izany. Ary ny fisehon’ilay hoe hitatra ilay triatra, hanalavitra, hanalavitra, hanalavitra an’Andriamanitra ianao ry havana o. Hiha-misaraka amin’Andriamanitra.

Misaotra an’Andriamanitra ny amin’ny ohatra tsara be omen’ny Soratra Masina antsika omaly, ny amin’izany lehilahy efa tena nanala izany akanjo tonta izany, dia tsy iza izany fa i Zakaiosy ry havana. Zakaiosy io, lehilahy hoe nataon’i Jesoa ho anton-diany nankany Jeriko. Hanavotra an’iza ? Hanavotra olona iray, nakany Jeriko i Jesoa ry havana o. Ary Zakaiosy rehefa nifanena tamin’i Jesoa ry havana, dia niteny hoe « ny antsasaky ny fananako dia omeko ny malahelo, ary raha misy zavatra nalaiko tamin’ny fisolokiana, na tamin’ny fanambakana, dia avotako avo efatra heny ». Ary tena nisoloky, nanambaka Zakaiosy ry havana o ; ary nanam-bola izy an. Ny mpamory hetra rehetra nanam-bola, fa rehefa mijery ny Lioka 19 ianareo, dia jereo fa tsy mpamory hetra izy fa chef-ny mpamory hetra. Ary tena nanam-bola tsy toko tsy foroana ; fa ny olona eo amin’izao tontolo izao ry havana, ary ny kristiana sasany, arakaraky ny hananana vola tsy toko tsy foroana, vao maika izy mahihitra, vao maika izy mahihitra ho an’ny asan’Andriamanitra. Izay ilay olona hoe manana lamba tontan’ny fitiavam-bola, asiana lamba vaovao mbola tsy nilona, ary dia tsy mahasoa izany.

Izay ny fahamarinana voalohany : Diniho ny fitafianao, sao dia triatra izany fitafianao izany : mitafy an’i Jesoa sy ny hamarinany, mitafy an’i Jesoa sy ny hatsarany, nefa triatra, tsy mahasoa anao izany.

Faharoa izany, eo amin’ny and. 17 ry havana. Hoy ny Tompo hoe : « Ary tsy misy manisy divay vaovao ao anaty siny hoditra tonta; raha izany, dia ho triatra ny siny hoditra, ka ho raraka ny divay, sady ho simba ny siny hoditra; fa ny siny hoditra vaovao no asian’ ny olona divay vaovao, dia miara-maharitra izy roroa ».

Ilay lamba izany an, any ivelany ; ity divay ity indray izany an, miditra ao amin’ilay mpino. Divay no ampiasain’i Jesoa anaovana fanoharana. Ao amin’ny Baiboly, ary ao amin’ny boky maro, ao amin’ny toko maro ao amin’ny Baiboly, ny divay dia manambara ny fahatezeran’Andriamanitra. Fa eto ry havana, ny divay indray dia hoe manambara fifaliana mahery vaika, manambara fifaliana lalina. Ary dia izay no lazain’i Jesoa : misy olona hoy Izy, mba hoe misy an’ily divay vaovao, ilay divay mahery vaika io, nefa siny hoditra efa tonta no andraisany azy, dia vaky ilay siny, triatra ilay siny, simba ilay siny ary fanampin’izany, hoe very fotsiny ilay divay mahery izany. Ilay fanontaniana ry havana, dia hoe : inona indray ary ity hoe siny hoditra fitehirizana divay ity ? Tsotra ry havana io hoe siny hoditra resahin’i Jesoa io. Tsy inona io ry havana o, tsy inona io fa ny foko, ny fonao olombelonao, ny fonao efa simban’ny fahotana, efa simban’ny divay elan’ny fahotana, fo efa zatra fahotana ka azo lazaina hoe maty : maty fo, maty eritreritra. Izany io siny hoditra ho vaky io, raha asiana ilay divay vaovaon’ny fanjakan’ny lanitra ry havana.

Rehefa nojerena ny tantaran’ny jiosy, ny tantaran’i Isiraely eto ry havana, dia tena hoe tonga tokoa Jesoa nitondra an’io divay vaovao io, io divay mahery io. Mahery ilay izy satria arakaraky ny hihotrehany dia mihamahery hono, mihamahery ilay izy satria arakaraky ny hihotrehany dia mandroatra dia mihinana an’ilay hoditra izany. Mitondra an’io divay mahery io Izy, dia mbola Pasitera Rakotonirainy ihany no mitantara hoe : ireto jiosy ireto niaraka tamin’ilay sinin’ny fony feno fahotana, dia lasa mamo, mamon’izany divay vaovao izany, hany ka nanao zava-doza izy. Inona no noteneniny izy mamo sy nanao zava-doza ? Niteny hoe : homboy, homboy, homboy ! Sanatria an’izany, misy mpandray ny fanasan’ny Tompo ve eto ry havana, mpandray ny fanasan’ny Tompo anarana nefa ny fony mbola ilay siny tonta feno fahotana, ka mankalaza an’Andriamanitra, manompo an’Andriamanitra aza, nefa ny toe-po , ny toe-tsaina, ny toe-panahy dia toe-pon’ny olona mamo tahaka ny an’ireto jiosy ireto ka manao anakampo hoe : homboy, homboy, homboy ?

Nampisotroana ry havana ireto jiosy ireto ary fampieritreretana ho antsika izany ; nampisotroana ireto jiosy ireto, izany hoe divain’ny filazantsaran’i Jesoa izany, nampisotroana an’izany ho divay hitondra fifalian’ny lanitra izany. Kanefa izao : satria ratsy ny fony, tsy nety nandray izy, fa nihanjonanjona, niavonavona, dia inona ny zavatra nitranga ? Nanjary hoe lotika ny fony, lotika ny fon’ireto jiosy ireto ry havana o. Ka ilay divay io, ilay divay io izay hoe niseho tamin’ny alalan’ny famantarana isan-karazany, tamin’ny alalan’ny fampianarana feno fahendrena sy feno fahefana ; io divay vaovao io izay niseho tamin’ny alalan’ny fanasitranana mahagaga, io divay vaovao io izay niseho tamin’ny fandroahana demonia sy ny fanafahana olona maro avy tamin’ny fanahy maloto, io divay vaovao io lasa nivadika ho famonoana teo amin’ny hazo fijaliana. Inona no vokatr’izany ary fampieritreretana antsika e, izay mbola hoe mianjona, miavona, mihifikifi-doha eo anatrehan’ny Tompo ? Fampieritreretana ho antsika ry havana : vaky ny sinin’ny jiosy, vaky, araka ny tenin’i Jesoa, ilay sinin’ny jiosy ; levona niaraka tamin’izay ny firenena jiosy ary rava ny tempoly. Ny olona mihifikifi-doha tsy mety mandray an’ilay siny vaovao atolotr’i Jesoa ry havana, fa miavona, mihevi-tena ho efa tanteraka, sarotra anarina, sarotra tenenina, dia izany no miandry azy : fahavakian’ny siny, fahalevonan’ny fiainana ary faharavan’ny fiainana.

Mampieritreritra antsika ry havana o, mampieritreritra antsika ny Tompo amin’izao maraina izao : tia antsika Izy ary tsy tiany isika ho izany hoe siny manana fo vaky ary very divay izany. Ilay divay angaha moa very, very ho anao ilay izy, fa angaha moa very ; fa ianao no maty antoka manana an’izany siny tonta mora vaky izany. Handray ny fanasan’ny Tompo isika rehefa avy eo ry havana o, handray ny fanasan’ny Tompo isika, dia hoy ny Tompo aminao mpandray ny fanasan’ny Tompo amin’izao maraina izao : aoka izay, aoka izay io divay elan’ny fahotana mahazatra anao io, aoka izay io divay elan’ny fahotana mahatonga anao hiodina amin’Andriamanitra sy hanohitra ny teniny io. Aoka izay io hoy Izy e ! Aoka izy io amin’izao maraina izao, fa hoe, ny Tompo ry havana, amin’ny alalan’ny fandraisana ny fanasan’ny Tompo, omban’ny Fanahy Masina, te hanome anao an’izany divay mahery vaika izany, dia ilay fifaliana mahery vaika avy any an-danitra, hampifaly ny fanahinao, hampitoetra anao ao anatin’ilay fiadanana izay mihoatra noho ny fahalalana rehetra e. Misy ve ato, olona mety ny fiainany, satria manana position sociale ohatran’izao, manana vola sy harena ohatran’izao nefa rehefa jerena, diny hoditra tonta, tontan’ny fahotana efa mahazatra hatramin’ny ela ?

Manome anao fotoana, manome antsika fotoana handinihina tena ny Tompo amin’izao maraina izao dia hoy Izy hoe : raha mbola tsy nanapa-kevitra ianao, araka ny teniko tamin’i Zakaiosy omaly, anio, manapaha hevitra : raiso i Jesoa ho Tomponao sy Mpamonjinao dia ho tonga zanak’Andriamanitra ianao ary dia ho fenoiny ny fonao sy ny fanahinao, ho fenoiny izay divay maherin’ny fanjakan’ny lanitra izany. Ary ny ivelany, dia ampitafiany an’i Jesoa ianao, ary tena hanana fitafiana mamiratra ianao, ary ao amin’ny ankohonanao, ianao lehilahy, mba ho tena lehilahy araka ny fon’i Kristy ianao, satria mitafy ny fahamarinana, mitantana ny ankohonanao ho amin’ny fahamarinana sy ny fitiavana ; ary ianao vehivavy, sitrana ianao amin’izay maha-triatra ny fanahinao ary ho tena hoe vady mpamonjy ny vadinao, ho tena reny mpitaiza ny zanakao ho amin’ny fonao. Izany ve ianao ry havana o ? Sanatria an’izany, sao dia hijanona amin’izao fahatriatranao izao ianao rehefa handiha ny varavaran’ny fiangonana hody any an-tokantranonao ?

Ho aminao ny fahasoavan’ny Tompo. Amena                    

Ao amin’ny 1 Petera ry havana no hanombohana izao toriteny izao : 1Petera 1 :13 ; ary toriteny, mazava ry havana, fa natao ho an’ny sarababen’ny Fiangonana, fa ampiana avy hatrany hoe toriteny natao ho an’izay manantena fa rehefa miala ety an-tany izy, dia hamantana any amin’ny fanjakan’ny lanitra. Izany ity toriteny ity. Iana izay mbola tsy rototra amin’izany, ho hitanao fa tsy hiteny aminao ity toriteny ity ; kanefa taomin’ny Tompo eto ianao amin’izao maraina izao, mieritrereta ihany, mandiniha tena ihany, apetraho ho tanjona izany hoe ho tonga, tafiditra any amin’ny fanjakan’ny lanitra izany, na oviana na oviana no hiala eto ianao.

1 Petera 1:13 : « Koa amin'izany sikino ny sainareo, dia mahonona tena, ka antenao tsara ny fahasoavana izay ho entina ho anareo amin'ny hisehoan'i Jesosy Kristy ».

Koa amin’izany sikino ny sainareo – sikino ny sainareo. DIEM, hitantsika teo dia hoe : « aoka ho vonombonona ny fanahinareo ».  Sikino ny sainareo.

RESAKA SIKINA

Ny sikina ry havana, dia ilay lamba ahodidina amin’ny lehilahy na amin’ny vehivavy ; ka rehefa hoe misy asa sarotra manokana, na rehefa hoe afainganina ny dia eny an-dalana, dia ilay lamba ahodidina ny tena iny, ampidinina na ampiakarina, dia afatotra amin’ny valahana. Izay ilay izy. Misy izany mampiakatra azy, misy mampidina azy mba hahafahana mandrha haingana ; fa ilay sikina dia afatotra ao amin’ny valahana, satria hoe hiatrika asa mafy, hiatrika fahoriana, satria hoe mila fainganina ny dia. Izay ilay nolazaina tery am-piandohana hoe ity resaka sikina ity dia natao ho an’ny olona izay mahatsiaro an-dalana, fantany izy fa tsy velombelom-poana, fa hoe an-dalana izy ho any amin’izany fanjakan’Andriamanitra izany ; ary tsy milalao an-dalana fa herezina ny dia, fainganina ny dia ; izay ilay resaka sikina ry havana. Ary eny an-dalana eny izy, tsy maintsy ho tojo fahoriana : izay ilay hoe sikino ilay saina. Sikino ilay saina, ataovy vonona ilay saina, ataovy matanjaka ilay saina, ataovy mibanjina zavatra tokana ny sainao dia ny fahatongavana any amin’ny fanjakan’ny lanitra. Izany ity hoe resaka sikina ity, natao ho an’ny olona an-dalana ho any amin’izany fanjakan’ny lanitra izany ary manao ho zava-dehibe eo amin’ny fiainany ny hahatongavana any amin’izany hoe fanjakan’ny lanitra izany. Ianao ve izany ry Fiangonana o ? Ianao ve izany manantena hoe voasoratra any an-danitra izany ny anaranao, ary rahatrizay miala eto ianao dia tsenain’ny Tompo any amin’izany lanitra izany, ary satria ianao hiditra any an-danitra, tsy hipetrapetra-potsiny ety fa mandeha, an-dalana, ary sikininao ny sainao ? Izay ilay zavatra hodinihintsika anio ry havana. Dia andao jerentsika amin’ny tantaran’i Hezekia mpanjakan’i Joda, anisan’ny mpanjaka tsara indrindra teo amin’ny firenena Joda, ny fampiarana an’izany hoe Fiangonana misikina ny saina izany, efa misikina ny saina izany. Izay ilay toriteny moa izany, hoe : saina efa misikina.

2Tantara 29, tantaran’i Hezekia, mpanjakan’i Joda, tena hoe nanana saina nisikina, nibanjina an’Andriamanitra sy fanjakany. Ka zavatra anehoany an’izany, eo amin’ny and.10 : « Ka dia efa mby ato am-poko ny hanao fanekena amin'i Jehovah, 
Andriamanitry ny Isiraely, mba hiala amintsika ny fahatezerany mirehitra ». Mpanjaka miakatra eo amin’ny fitondrana : amin’ny volana voalohany amin’ny taona voalohany niakarany teo amin’ny fitondrana, nandimby ny dadany, izany ny tarigetrany ho an’io firenena izay nametrahana azy ho mpanjaka io, hoe mavesatra ato am-poko ny mba hiala amin’i Joda ny fahatezeran’Andriamanitra mirehitra, miala amin’ny firehetan’ny fahatezeran’Andriamanitra, miala, handositra ny fahatezeran’Andriamanitra. Izay ny fahamarinana 1, fampiarana an’izany hoe mpino manana saina misikina izany.

Fahamarinana 1 : ATAOVY IZAY IALAN’NY FAHATEZERAN’ANDRIAMANITRA AMIN’NY FIRENENAO, AMIN’NY ANKOHONANAO, AMIN’NY FIAINANAO EO AM-PIANDRASANA NY FIDIRANA ANY AMIN’NY FANJAKAN’NY LANITRA

Nirehitra tamin’i Joda ny fahatezeran’Andriamanitra noho ny afitsok’i Ahaza rain’i Hezekia, izay tena hoe tompon’ny fanompoan-tsampy. Ary izany Ahaza izany dia anisan’ny nanolotra ny zanany ho dorana tamin’ny afo ahazoany fitahiana amin’ny sampy. Izany io Ahaza io. Fa Hezekia ry havana, araka ny perikopa androany, tsy mba nanao izay nataon’i Ahaza rainy, fa araka ilay and.2 : «Ary nanao izay mahitsy eo imason'i Jehovah izy, tahaka izay rehetra nataon'i Davida rainy ». Rainy moa izany, hoe razany. Nanao izay mahitsy, mba hialan’ny fahatezeran’Andriamanitra.

Fa inona ny zavatra nitranga rehefa tonga ilay fahatezeran’Andriamanitra amin’ny firenena anankiray ? And.8-9 : « Ka dia nihatra tamin'ny Joda sy Jerosalema ny fahatezeran'i Jehovah, ka nanolotra azy ho mpanjenjena izy sy ho figagana ary ho zavatra mampisitrisitra toy izao hitan'ny masonareo izao, Fa he! lavon'ny sabatra ny razantsika, ary ny zanakalahintsika sy ny zanakavavintsika sy ny vadintsika dia efa babo noho izany ». Ry havana, isika rehetra ireto samy manana izay fandresen-dahany, samy manana izay firehana politika misy antsika ; fa peu importe izay firehana politika, tsisy Madagasikara handroso eo, raha mbola iharan’izany fahatezeran’Andriamanitra izany. Tsy misy firenena handroso eo, raha mbola iharan’izany fahatezeran’Andriamanitra izany. Ary inona ny zavatra mitranga eto rehefa hoe iharan’ny fahatezeran’Andriamanitra Joda sy Jerosalema ? Hoe : nanolotra azy ho mpanjenjena. Mandrak’izao anie ry havana, maro ny malagasy no mpanjenjena ara-panahy e ! Tapitra voatetiny daholo ireo sekta ireo nefa hoe tsy mahita an’i Jesoa izy, iharan’ny fahatezeran’Andriamanitra izy ; natolotr’Andriamanitra izy «ho figagana ary ho zavatra mampisitrisitra toy izao hitan'ny masonareo izao ». Hoy ny DIEM hoe : « ohatra hampihoron-koditra », nataon’Andriamanitra « ohatra hampahonena », nataon’Andriamanitra « ohatra ho enti-maneso ». Sao dia izany ity firenentsika ity ? Sao dia izany isika kristiana malagasy, ataon’Andriamanitra hoe mampihorin-koditra izay mandinika ny fiainantsika ny  fahitana antsika ry havana? Sao dia isika ilay hoe mampahonena rehefa mandinika antsika ? Ary sao dia isika ilay hoe ho enti-maneso rehefa hoe mandinika antsika, satria ao anatin’ny fahatezeran’Andriamanitra isika ry havana ? Rahoviana isika malagasy no hanana filoham-pirenena voafidy ara-dalana ka hiteny hoe : « o re olona o, o ry malagasy mpiray tanindrazana amiko, ary indrindra, eo ianareo kristiana tahak’ahy, izay nandray an’i Jesoa Kristy ho Tompo sy Mpamonjy, na inona na inona anaram-piangonana misy anareo, ny anaram-piangonana misy antsika, hoe, ny zavatra ho ataoko, ny fanapahan-kevitra voalohany, dia atao izay ialan’ny fahatezeran’Andriamanitra amin’ity tanindrazantsika malala ity ». Rahoviana isika vao hanana an’izany ? Fa rehefa hankalazan ny faha-59 taona isika, amin’ny faha-60 taona ny fahaleovan-tena, anaty ozona sy eo ambany fahatezeran’Andriamanitra, ilay fihetsika ivelany, défilé sy ny matso atao ihany !

Ary hoy ny tenin’Andriamanitra hoe, rehefa nihatra taminy ny fahatezerana, « lavon'ny sabatra ny razantsika, ary ny zanakalahintsika sy ny zanakavavintsika sy ny vadintsika dia efa babo noho izany ». Mahavaky fo anie ny mahita an’ireny tanora vavy malagasy lasa babon’ny vazaha fotsy sy vazaha mainty e ! Izany ilay fahatezeran’Andriamanitra. Tany Diégo izahay, niaraka tamin’i Pasteur Ammi tamin’ny Alakamisy sy Zoma teo, rehefa mandeha, lalina izany hoe tovovavy kely, tsara tarehy, miaraka amin’ny anti-dahy ; lasa babon’ny vahiny noho ny fahatezeran’Andriamanitra ity firenena ity, ny zanakavavintsika sy ny vadintsika ry havana. Dia hoy ny Tompo, ianaro, tahaka an’i Hezekia, hoe manànà saina misikina, ary rehefa manana saina misikina ianao, satria mibanjina an’izany fanjakan’Andriamanitra marina izany, dia hoe ataonao ho vaindohan-draharaha izany hoe ialan’ny fahatezeran’Andriamanitra aminao, amin’ny ankohonanao, amin’ny fiangonanao sy amin’ny firenenao izany.

Fahamarinana 2 : NY OLONA MANANA SAINA MISIKINA DIA TSY MANGATAK’ANDRO MANAMASINA NY TENANY

Ka rehefa hoe manao izay ialan’ny fahatezeran’Andriamanitra amina firenena izany ry havana, inona no mbola ohatra omen’i Hezekia antsika Fiangonana androany ? Eo amin’ny and.4-5 : «Ary dia nampidiriny tao ny mpisorona sy ny Levita ka nangoniny teo ankalalahana atsinanana.  Ary hoy izy taminy: Mihainoa ahy, hianareo Levita, ka hamasino ny tenanareo izao» ; and.12 : «Dia nitsangana ny Levita ». Ny olona, izay hoe miala ny fahatezeran’Andriamanitra dia manamasina ny tenany. Ary tsy vitan’ny hoe manamasina ny tenany, fa ity no tena tsindrina : tsy mangatak’andro hanamasina ny tenany. Tsy hoe, efa henoko izay Pasitera an ; tsy mangatak’andro hanamasina ny tenany. Izay no nahatonga antsika namaky an’ilay hoe : « Dia nitsangana ny Levita » : vao nafaran’i Hezekia mpanjaka ny mpisorona sy ny levita, dia nitsangana ny levita ka nanamasina ny tenany. Iza moa ireto mpisorona sy levita ireto ry havana ? Ny mpisorona moa, dia ireo no mpanao sorona, arak’izany anarana izany tao amin’ny tempoly ; ary ny levita dia karazany hoe adjoint na assistant-ny mpisorona. Raha amin’izao fotoana hitenenantsika izao izany, ny mpisorona dia azo oharina amin’ny mpitondra fivavahana rehetra ; ny levita dia ny mpanampy azy, assistant na adjoint, dia ireo manao asa-na diakona. Izany hoe Hezekia mpanjaka te hampiala ny fahatezeran’Andriamanitra tamin’ny firenena Joda sy Jerosalema, inona no nataony ? Miantso ny mpitondra fivavahana rehetra ao Joda sy Jerosalema izy, sy ny levita mpanampy azy, dia hitenenany hoe : manamasinà ny tenanareo ianareo. Izany ny antoky ny fipoiran’ny fifohazam-panahy eo amin’ny firenena anankiray ; ary rehefa mipoitra izany fifohazam-panahy izany, tahaka ny tamin’ny andron’i Hezekia ry havana, dia tonga ny fandrosoana amin’ny lafiny rehetra. Tsisy firenena handroso raha tsy mandalo amin’ny fifohazam-panahy, ary tsisy fifohazam-panahy ipoitra eo, raha tsy manamasina ny tenany ny mpiandraikitra voalohany ao amin’ny Fiangonan’Andriamanitra. Ary aza mangatak’andro amin’izany hoy ny Tompo, amin’ny alalan’ity tantaran’i Hezekia ity.

Mamarana ny volana andinihina ny lohahevitra hoe : Manamasina ny fiainanao ho an’ny Tompo, na ao amin’ny Tompo ; ampatsiahivina kely ny amin’ity hoe fanamasinana ity. Zavatra 3 fohy ry havana, tsy te hoe hanalava resaka, fa heverina hoe adidy ny mampilaza an’izany an’ny Fiangonana ; misy endriny 3 ity hoe fanamasinana ity : rehefa miteny ny Soratra Masina hoe « manamasinà ny tenanareo », ny zavatra volaohany ampatsiahivina aloa ry havana dia hoe : Andriamanitra no manamasina antsika. Izay no zavatra voalohany. Ianareo izay maka naoty, raiso kely izay. Araka ny tenin’Andriamanitra ao amin’ny Eksodosy 31 :13 : «Izaho no Jehovah Izay manamasina anareo ». Tsisy olona hanamasina ny tenany eo, raha tsy mahatsiaro aloa izy hoe possible ny manamasina ny tenako, satria Jehovah aloa efa nanamasina ahy. Izay ny zavatra voalohany. Ny zavatra faharoa dia izao : inona moa no ataon’i Jehovah, inona moa no ataon’i Jesoa raha hoe nanamasina antsika ry havana ? Ny zavatra nataony dia faran’izay tsotra, hoe : rehefa hoe antsoiny isika, sarihiny isika avy any amin’ny tontolo niainantsika tany, teo amin’ny faha-jentilisana, teo amin’izao tontolo izao, teo amin’ny fisainan’izao tontolo izao, ny fahafinaretan’izao tontolo izao, ny fifalian’izao tontolo izao, sy ny karazany tany amin’izay nanalavirany antsika tany ; nosarihiny isika ho eo Aminy, nafahany izany, rehefa no-tontaliana, tamin’ny fanandevozan’ny ota sy ny fanandevozan’i Satana. Izay ilay olona tsy manatona : eo ambany fanandevozan’ny ota, eo ambany fanandevozan’i Satana. Dia hoe izay ilay endrika faharoa ambara momban’ny fahamasinana ry havana. Asan’Andriamanitra ilay izy, voalohany indrindra, ary faharoa, rehefa mandray an’i Jesoa ho Tompo sy Mpamonjy ianao, dia hoe masina ianao, voasarika avy any ianao. Ny endrika fahatelo amin’ilay fahamasinana ry havana dia izao : tsy tapitra eo ilay fanamasinana, fa ho an’ny olona efa nosarihina ohatran’izany ka nandray Azy marina, dia miditra an-tsehatra ny Fanahy Masina manavao isan’andro ary manamasina. Inona no dikan’ilay hoe manamasina ? Inona no dikan’ilay fanamasinana ataon’ny Fanahy Masina ? Manova tsikelikely ilay fomba fisainanao. Angamba mizara roa isika : ny olona efa manana saina misikina, ary ny olona tsy mahafantatra. Fa enga anie ka ny Fanahy Masina hiasa aminao amin’izao maraina izao, dia hoe hanova tsikelikely izany fisainanao izany, mba ho fantatrao ny maha-zava-dehibe, ny maha-fampianarana volamena an’izany hoe : manànà saina misikina ry Fiangonana o. Fa asan’ny Fanahy Masina, rehefa nandray aho, hoe : manova tsikelikely izany fomba fisainako izany, manova tsikelikely ny foko, ary manova ahy tsikelikely mba hoe ho atokako marina ho an’i Jesoa ny fiainako sy izay rehetra momba ahy ; fa tsy hoe misy compartiment, misy lafim-piainako sasany tena hoe tsy idiran’i Jesoa ry havana. Izay ilay hoe fanamasinana. Hatreto izany, amin’izay lafiny anankitelo izay, asan’Andriamanitra ilay fanamasinana. Fa ny endriky farany dia hoe ahoana ny fampiarana an’izay fanamasinana izay ? Izaho no manamasina ny tenako amin’izay. Izaho no manamasina ny tenako rehefa hoe mahatsiaro tena an’izay zavatra anankitelo izay. Manamasina ny tenako aho : miezaka aho hiady amin’ny fahotana, miezaka aho hiady amin’ny fakam-panahy, izay mamesatra, izay manelingelina amin’ilay diako sy ilay hazakazako ho any an-danitra ka mety tsy haha-tody ahy any an-danitra ry havana o. Tsy resaka morale ny fitenenana hoe tohero, alaviro, reseho, aza avela hanjaka ny fahotana. Tsy resaka morale izany, fa resaka hoe entana mamesatra anao na dia misikina aza ianao, tsy ahafahanao mankany an-danitra ; fa rehefa hoe misikina marina ianao, misikina ny sainao, dia fantatrao hoe ireto mbola tokony ialako, ireto mbola tokony ialako, ireto mbola tokony ialako ary ny Fanahy Masina ry havana o, no mampiala anao tsikelikely, manondro anao tsikelikely an’izany. Fadio, araka ilay tenin’i Petera teo, ilay hoe fitondran-tena ratsy rehetra. Na izaho na ianao, samy mahalala an’izany fitondran-tena ratsy tokony ialana izany ; fa ny maha-samy hafa antsika dia izao : ny sasany mahalala ary te hiala ; ny sasany mahalala, ary manamari-tena.

Izay ilay fahamarinana faharoa izany hoe : aza mangatak’andro, manamasinà ny tenanareo ry Pasitera, ry mpitondra fivavahana, sy ry diakona namany. Aza mangatak’andro amin’izany dia hiala ao aminao sy ny ankohonanao, hiala amin’ity firenena ity izany fahatezeran’Andriamanitra izany.

Fahamarinana 3 : NY OLONA MANANA SAINA MISIKINA DIA TSY MALAINA

Inona no mbola ampianarin’i Hezekia antsika ry havana ? Ny fomban’ny olona hoe manana saina misikina dia hoe :

- Mampiala ny fahatezeran’Andriamanitra

- Mitaona ny mpitondra fivavahana sy ny diakona tsy hangatak’andro hanamasina ny tena.

Ary jerentsika ny and.11 : « Ry zanako, aza malaina hianareo; fa hianareo no nofidin’ i Jehovah hijanona eo anatrehany hanompo Azy ka ho tonga mpanao fanompoam-pivavahana sy mpandoro ditin-kazo manitra ho Azy ». Izany olona manana saina misikina izany ry havana o, dia tsy malaina, tsy malaina.

Ny fahamarinana teo aloha dia hoe tsy mangatak’andro ; ny fahamarinana ankehitriny hoe : tsy malaina. Zavatra roa no itarafana an’izay hoe fahavitrihina ara-panahy, fahazotoana ara-panahy izay ho an’ny olona izay manana saina misikina. Tenenina ilay mpisorona, tenenina ilay levita hoe : nareo nge aza malaina e ! fa hianareo no nofidin’ i Jehovah hijanona eo anatrehany hanompo Azy ka ho tonga mpanao fanompoam-pivavahana. Ry Fiangonana ô, izay manana saina misikina : aza malaina manao fanompoam-pivavahana.

Rehefa jerena, tsy dia hoe tsy fitiavana diakona akory na inona, fa rehefa mijery ny fiainan’ny diakona any an-kafa any ry havana, ny zavatra mampalahelo, dia hita io fahalainana io : rehefa tsy service ilay diakona, dia tsy miangona ao amin’ilay Fiangonana nifidy azy ho diakona izy. Tsy miangona fotsiny izy : « ny anay moa Pasitera dia miala tsiny, fa izahay, any Manjakandriana no mipetraka dia rehefa tsy service izahay dia any izahay no miangona ». Dia roa volana izy tsita mihitsy. Fa maninona tsy misoratra any Manjakandriana dia any no manao diakona fa maninona no mikiry ho aty Isotry Fitiavana rehefa lavitra aminao Isotry Fitiavana? Izay ilay fahalainana ry havana. Izany hoe ianao tsy afaka hoe hanana saina misikina ka hazoto amin’ny fanompoam-pivavahana nefa ianao kamo mamonjy fanompoam-pivavahana rehefa tsy service ianao. Fa tsy izay ny tena zava-dehibe eto, na dia hoe zava-dehibe ary izany. Ry havana o, rehefa jerena anie, eo izany izahay mpisorona, mananatra rehefa aty am-piangonana rehefa Alahady, fa eo ianareo levita, ianareo levita anie no miparitaka sy miely patrana eran’ity nosintsika ity e. Ary tenenina hoe aza ny Alahady ihany ianareo no manao fanompoam-pivavahana, fa aoka ny Alatsinaina ka hatramin’ny Asabotsy, dia manao fanompoam-pivavahana isan’andro ianao. Aoka io asanao io, ho karazana fanompoam-pivavahana. Andeha ange jerentsika e : tonga saina aho ny amin’ity hoe fanompoam-pivavahana, miresaka fanarenam-pirenena mantsy isika eto, miresaka fanasitranana firenena mantsy isika eto ; ary ity firenentsika ity, mila sitranina ry havana. Romana 13 :1 : « Aoka ny olona rehetra samy hanaiky ny fahefana lehibe. Fa tsy misy fahefana afa-tsy izay avy amin'Andriamanitra; fa izay misy dia voatendrin'Andriamanitra », hoe ekeo io fahefana amboninao io fa avy amin’Andriamanitra izany. Fa ny zavatra tsikaritra ry havana, eo amin’ny Romana 13:6 : « Fa noho izany no andoavanareo vola hetra; fa mpanompon'Andriamanitra mitandrina izany zavatra izany indrindra ireny ». Eo ny fahefana lehibe izay mampandoa hetra ireo, ekeo ilay hoe fampandoavan-ketra e. Izay ilay izy, fa ireo fahefana lehibe ireo, dia lazaina hoe mpanompon’Andriamanitra. Ilay autorité politique izany, ilay mpitondra fanjakana izany :mpanompon’Andriamanitra. Ary ilay teny grika amin’io hoe mpanompon’Andriamanitra io, hoe olona mpanao litorjia, « leitourgía ». Raha Président de la République aho, raha praiminisitra aho, raha mpanolotsaina aho, raha tale, tale jeneraly aho any amin’ny ministera misy ahy, any amin’ny orinasa misy ahy ; fa any amin’ny fanjakana moa izao resahina izao : mpanao litorjia ho an’Andriamanitra aho ny Alatsinainy ka hatramin’ny Asabotsy, fa tsy hoe rehefa ato am-piangonana ihany vao hoe diakonos manao leitourgía ry havana o. Izany no hanovana an’ity firenena ity, ary izany no ampandosirana, ialan’izany hoe fahatezeran’Andriamanitra hirehitra amin’ity firenentsika ity. Tsarovy hoe « liturge », avy amin’ny hoe litorjia ihany, hoe liturge-i Jesoa ianao ry havana eo amin’ny fitondrana o. Izany ny hafatr’i Kristy ho anao, ary aza malaina manao fanompoam-pivavahana Alatsinainy ka hatramin’ny Asabotsy. Isaorana an’Andriamanitra rehefa mahare sasany aminareo : ao aminay Pasitera, misy cellule, ao aminay Pasitera misy fiombonam-bavaka, isaorana Andriamanitra, avy Aminy izany. Fa aoka tsy amin’ny cellule ihany no hoe manao litorjia ho an’Andriamanitra, fa aoka ilay fanompoanao, eo amin’ny fanjakana na inona na inona, dia hoe mpanompon’Andriamanitra ianao ary mpanao litorjia fiderana an’Andriamanitra. Ary araka ny tenin’ny Apostoly Paoly ao amin’ny Kolosiana, hoe : n’inon’inona ataonao, aza atao ho an’ny filoham-pirenena io, na ho an’olon-kafa, fa ataovy toy ny ho an’Andriamanitra. Hiova ity firenena ity, hiova ity firenena ity, raha ny mpanao politika rehetra, n’inon’inona firehany, ahatsiaro tena ho mpanompon’Andriamanitra, liturge-n’Andriamanitra, Romana 13, ary tsy malaina amin’izany.

Fahaefatra farany, faharoa amin’ity : aza malaina, hoy ny and.11, amin’ny fandoroana ditin-kazo manitra. Aza malaina amin’ny fandoroana ditin-kazo manitra. Io fandoroana ditin-kazo manitra io an, dia fomba fiderana an’Andriamanitra, fankalazana an’Andriamanitra tao amin’ny tempoly, ary ny mpisorona, isan’andro, isan’andro, dia mandoro ditin-kazo manitra eo amin’ny alitara fandoroana an’izany ditin-kazo manitra izany, dia misy fofona manitra miakatra ho any amin’Andriamanitra ry havana. Ary ny mpandinika dia milaza fa fiderana sy fankalazana an’Andriamanitra io. Ary isan’andro isan’andro, dia karazana ditin-kazo manitra samihafa no doran’ilay mpisorona, satria ilay karazana ditin-kazo anankiray milaza toetran’i Kristy anankiray, ny hatsaran’ny toetran’i Kristy anankiray. Izay no ao amin’ny Testamenta Taloha. Aza malaina mandoro ditin-kazo manitra.

Fa ho antsika ry havana, mpisorona, levita, mpino tsotra, hoy ny Tompo aminao, ary toriteny atao amin’ny olona manana saina misikina, an-dalana ho any amin’ny fanjakan’ny lanitra izao, hoe : ianao koa, aoka ho mpandoro ditin-kazo manitra ianao. Inona moa no dikan’izany ? Aoka ianao ho manim-pofona, aoka ianao ho manitra, hanitra manambara an’i Kristy ianao e. Aoka ho izany ny fiainanao ry havana o, hanitra manambara an’i Kristy ianao any amin’izay rehetra anirahan’ny Tompo anao. Miresaka ilay fiainana andavan’andro ry havana, misy olona, miresaka aminao izy, midorehitra be ilay ranomanitra. Indraindray moa misy tsara be ilay izy fa indraindray hoa ahoana ary ity, tsy mba manam-bady ve iny miteny hoe ajanony malala iny ranomanitra iny ? Misy indray olona, tsy manao ranomanitra izy, tsy maninona izany, tena tsy problema mihitsy izany. Fa misy olona indray, sady tsy manao ranomanitra izy, no maimbo tsemboka, maimbo helika ; ary izy irery no tsy mahanfatra hoe maimbo helika sy maimbo tsemboka izy an. Izay ilay zavatra ; izany hoe ny olona rehetra azo lazaina hoe samy manana fofona daholo, izay ilay izy ; fa izao ry havana o : rehefa mifanerasera amin’ny olona any amin’izay anirahan’ny Tompo ianao, ranomanitra lafo vidy avy any an-dafy ve no anaovanao, sa ianao maimbo inona na maimbo inona ? Sa hoe oay, hafa indrindra i anona iny, ilay ranabavy iny, ilay rahalahy iny, fa tena hoe manitra ny hanitr’i Kristy ; ny fiainana dia manambara izany hoe fahatsaran’i Kristy izany. Ary ilay mandoro ditin-kazo mantsy mantsy dia hoe milaza fiainam-bavaka ary fiainam-piankohofana. Mandinika anao ve ny olona, na tsy mitantara aza ianao, kilasiana hoe, iny indray, dia olon’ny vavaka, lehilahin’ny vavaka, vehivavin’ny vavaka, ary lehilahy na vehivavy hoe mpiankohoka eo anatrehan’ny Tompo. Aza malaina mandoro ditin-kazo manitra ho an’ny Tompo, ary aza malaina, meteza ianao ho hanitr’i Kristy ho an’ny mpiara-belona aminao, ary atomboy ao amin’ny ankohonanao izany. Hanitr’i Kristy ho an’ny vadinao ve ianao ? Hanitr’i Kristy ho an’ny zanakao ve ianao ?

Ry havana, faranana izao teny izao : raha miverina any amin’ny 2 Tantara 29, ny zavatra ambara ao amin’ny 2 Tantara 29 :3 dia hoe : « Tamin’ ny volana voalohany tamin’ ny taona voalohany nanjakany dia namoha ny varavaran’ ny tranon’ i Jehovah izy ka namboatra azy ».  Tamin’ ny volana voalohany tamin’ ny taona voalohany : ry havana o, ry havana o, noho izao toriteny izao, raha mbola tsy nanapa-kevitra ianao, dia raiso hoe « anio no andro voalohany amin’ny volana voalohany, sy amin’ny taona voalohany amin’ny androm-piainanao sisa », « aujourd’hui, c’est le premier jour du reste de ta vie ». Tapaho ny hevitra, ary aoka ianao hanana saina misikina, aoka ianao hanana saina misikina ; dia araka ny tenin’i Petera, hoe : mahonona tena amin’izany, mahononan tena ny amin’izany fa lavitra akaiky ny any an-danitra, ary afaran’i Petera hoe : sikino ny sainao, ary mahonona tena satria eny an-dalana ho any an-danitra, zavatra roa no tsy maintsy andalovanao : voalohany indrindra, zavatra hampihorohoro anao, zavatra hampi-panique anao, zavatra hampi-stress anao, mahonona tena, fa aza mora mi-panique, aza mora mikorapaka. Iray izay. Faharoa, mahonona tena, hoy Petera : aza avela ianao ho rebireben’ny rehak’izao fiainana izao, ny distraction sy ny plaisir eto amin’izao tontolo izao ; aza avela ho rebireben’izany ianao ry havana o, lavitra akaiky ny any an-tranon’ny Raintsika, fa hoy ny Tompo hoe : ianao, sikino ny sainao dia hanampy anao ny Tompo, homba anao ny Tompo, hiara-dia aminao Izy, ary Izy no hiasa ao aminao, na ny fikasana na ny fanaovana hahatanteraka an’izany hoe saina misikina izany, hahatanteraka ny sitrapony, ho fankalazana ny voninahiny ny fiainanao.

Ho aminao ny fahasoavan’ny Tompo. Amena